L-Uffiċċju tad-Direttur Ġenerali (Istrateġija u Implimentazzjoni) jipprovdi appoġġ u pariri lis-Segretarju Permanenti kif ukoll direzzjoni effettiva lill-maniġment għoli tal-Ministeru, bil-ħsieb li jinkoraġġixxi l-iżvilupp ta’ politiki, programmi, strateġiji u proġetti amministrattivi li jaqgħu taħt il-mandat tal-Ministeru, li kollha huma mmirati biex jiksbu kultura ta’ eċċellenza fis-servizz.
L-Uffiċċju tad-Direttur Ġenerali (S&I) huwa responsabbli għall-koordinazzjoni u l-monitoraġġ tal-azzjoni tal-pjanijiet marbuta mal-implimentazzjoni tal-Miżuri tal-Baġit, u l-Inizjattivi tal-Manifest Elettorali. F’dan ir-rigward, dan l-Uffiċċju jikkollabora kontinwament ma’ u jiggwida lill-partijiet interessati dwar il-kisba tal-miri stabbiliti fil-pjan ta’ azzjoni applikabbli – liema azzjonijiet imbagħad jiġu rreġistrati fir-rispons ta’ kull xahar rispettiv li l-uffiċċju jirreferi lill-OPM.
Il-verifiki mwettqa mill-NAO, il-Mystery Shoppers u istituzzjonijiet oħra ta’ sorveljanza huma għodod importanti biex jiġu identifikati lakuni proċedurali u operazzjonali. Rakkomandazzjonijiet relatati jservu biex itejbu l-proċeduri u l-proċessi eżistenti, bil-ħsieb li jippromwovu governanza tajba u jinkoraġġixxu kultura ta’ eċċellenza fis-servizz. Għal dan il-għan, l-Uffiċċju jiggwida u jikkollabora kontinwament mal-maniġment superjuri biex jiżgura l-adozzjoni effettiva u f’waqtha tar-rakkomandazzjonijiet.
L-Uffiċċju tad-Direttur Ġenerali (Istrateġija u Implimentazzjoni) jaġixxi wkoll bħala l-punt uffiċjali ta’ kollegament bejn il-Ministeru u l-Uffiċċju tal-Ombudsman u jiżgura li l-korrispondenza kollha li tikkonċerna każijiet li jaqgħu taħt ir-responsabbiltà tal-Ministeru tiġi ttrattata b’mod affidabbli, preċiż u f’waqtu. Huwa jwettaq ukoll il-funzjonijiet ta’:
- MHA Whistleblowing Reporting Officer, responsabbli biex jirċievi żvelar intern u jindirizza t-tħassib imqajjem kif xieraq.
- Uffiċjal ta’ Kollegament tal-MHA mal-Uffiċċju Nazzjonali tal-Verifika.
